Moulin Rouge

و انا فى اعدادى او ثانوى ..شفت فيلم ..ما فهمتش نصه ..عن مولان روج ..الفيلم كان اسمه غالبا

french can can

عجبنى ساعتها قوى ..بالذات ان الفيلم كان

musical show

و انا بحب النوع دا من الافلام جدا ..هو كان فيلم ابيض و اسود على ما افتكر او الوان مش واضحه و شفته من غير ترجمه ..و كنت ساعتها لسه صغيرة ..يعنى بالكتير قوى كنت فى اولى ثانوى ..و من ساعتها و مولان روج معملمه معايا ..و فيلم نيكول كيدمان كان عندى من كذا سنه ..من زمان قوى ..لدرجه انى مش فاكرة من امتى ..بس فاكرة انه لما جالى ..ناس كتير طلبته منى لانه ما كانش موجود ..و ساعتها كان من غير ترجمه ..دورت لحد ما جبتها و حاولت اتفرج عليه كتير جدا ..بس دايما كان بيحصل حاجه تخلينى ما اكملوش ..لحد اما اتخنقت ..لأانى اصلا مش بحب اشوف افلام على الكمبيوتر و قررت انى مش هتفرج عليه و بعدها كمان طار من على الجهاز و نسيته ..مع حاجات كتير بننساها فى الدنيا ..بس النهارده شفته ..بجد المخرج جامد جدا ..بحب الافلام دى قوى ..و المخرج عامل حاله مختلطه من الافلام القديمه قوى بشكل و بتكنيك جديد و يمكن غريب ..يمكن دى الحاجه الوحيده اللى كنت عارفاها من زمان و كنت عارفه الصه و اتفرجت على كام مشهد من الاول و الاخر ..بس لما شفته على بعضه ..حلو قوى ..قصه بسيطه معروفه ..و اتعملت كتير جدا ..بس الشكل اللى طلعت بيه مختلف تماما ..الصورة حلوة قوى و الاغانى جامده جدا جدا جدا ..من المرات القليله اللى اركز فيها مع اغانى بلغتها و افهمها و ابقى مبسوطه من الطريقه اللى اتكتبت بيها ..

بتهيالى زيى زى اى بنت ..ساعات ممكن تحس بنفسها مكان البطله ..بس انا

بصراحه ..كنت بحسد نيكول كيدمان نفسها مش البطله ..على الشغل اللى فى الفيلم و عليها هى نفسها ..حلوة قوى ..قوى ..قوى ..و ...حلوة قوى ..و.....حلوة..فى كل حاجه حلوة ..فى شكلها ..فى صوتها ..فى تمثيلها ..فى كل حاجه ..

الفيلم بيرجعنى لنفس السؤال ..مين احسن ..حب قوى قوى قوى..ما يستمرش ؟؟و لا حب عادى ..هادى ..بس مستمر ..بنشوف فى افلام كتير الاتنين اللى حبوا بعض حب قوى قوى ..افلام بجد ..و مشاهد جامده و مشاكل اجمد و فى الاخر تحصل حاجه تخليهم يسيبوا بعض ..البطل او البطله يموتوا ..حد يعيى ..حد شرير يتدخل و بيفرق بينهم و تحصل حاجه ..المهم ان النهايه ما تكونش التبات و النبات ..كتيردا بيحصل و اكتر بفكر ..يا ترى لو اتجوزوا كان ايه اللى حصل ..نفس الحب كان هيبقى موجود؟؟

فى صورة تانيه بقى ..يجيبوا الناس و شعرهم ابيض ..بيحكوا ..على الحب برضه ..حب بشكل تانى ..هادى ..ما فيهوش احداث الافلام اللى تخليك قاعد قدامها مشدود..دا نوع تانى بنشوفه برضه فى الافلام ..يمكن النوع التانى دا بقى شفته برضه فى فيلم امبارح ..

spider man

كان نفسى اكتب عنه ..بس مولان روج ..نجده ..المهم كان فى عمه و مرات عمه و مرات عمه و هى بتحكى ..حب ..قوى ..هادى ..عادى ..اختاروا الوقت ..و اخدوا وقتهم فى التفكير و دراسه علاقتهم ..اللى كان هتكمل ال 50 سنه!!1

كل نوع فيهم فى الاخر حب مع اختلاف ظروفه و شكله و اخلاف البنى ادمين.. بس كتير كنت بسالنى ..مين احسن من وجهه نظرى ..مين اللى احب اعيشه و مش لازم اعيشه ..بيتهيالى ان زيى زى ناس كتير ..ممكن اروح لحب الافلام الجامد دا ..بس انا بقى بروح لحظات ..و برجع بحس انه مش انا ..ان عمرى ما هبقى كدا ..مش عارفه ليه ..بس برجع فى الاخر دايما بشوفنى فى الوش الهادى ..والشكل العادى و المشاكل اللى كل الناس بتمر بيها ..المواطنه المطحونه اللى هتدور على المواطن المطحون ..

طول عمرى بحب نيللى و شريهان و كان نفسى ابقى زيهم ..بسسس ..لما تسالنى عن الافلام او المسلسلات اللى محفورة جوايا ..هتلاقى اثار الحكيم متربعه ..الحب و اشياء اخرى ..كنت صغيرة قوى و مش افهمه ..بس كنت بستناها ..الحب على هضبه المقطم ..اللى برضه ما كنتش بفهمه ..افلام كتير ممكن ما افتكرهاش و ممكن ما اكونش شفتها من سنين ..بس بصدقها و بحسها و محفور جوايا اثارها ..افلام التمنينات و مشاكلها ..و مشاكل الاتنين اللى مش لاقيين شقه و الدنيا مطلعه عنيهم ..الافلام اللى ما بقيناش بنشوف منها كتير اليومين دول و اللى رجعنا نشوف صور زمان العربيه الاخر موديل و الشقق اللى زى بتوع برة و المحلات و البارات و الشرب العادى و السجاير اللى على طول فى ادين الممثلين ..صور حقيقيه لطبقه موجوده فعلا ..بس مش الاغلبيه المطحونه

بشرق و اغرب كتير و جوايا لكتر و اكتر ..يمكن مش بعرف اعبر ..بس الكلام من غير ما نزقه ..لوحده بيظهر ..