انا هرجع ..هحاول ارجع .. انسى الفيس بوك ..هنا احلى كتير ...و قررت ارجع تانى ..يمكن اقفله ..يمكن ...بس حتى لو قفلته ..هفتحه ..هههو هرجع:-)

يـــــــــــــــــــــــــــــــــــــــــــــــــــــا رب

اللى مسافرة و اللى مهاجرة و اللى قاعده و اللى و اللى ..كالها قصص ..فشل..هو احنا اتعلمنا غلط و لا كلنا اخترنا رجاله غلط ؟؟؟كلنا غلط؟؟؟

فى احساس نفسى اوصفه ..بس مش بعرف ..متاكده ان كل بنت فى الدنيا حسته مع حد ..و كتير بحسد البنات اللى عندهم اخوات ولاد لانهم اكيد بيحسوه معاهم ..انك تحسى بكيان اكبر منك ..بيحميكى احيانا ..و ما بتشيليش هم و هو معاكى ..كيان صلب ..رجليه ثابته فى الارض و حركاته واثقه وهاديه ..مهما كنتى متوترة ..تلاقيه هادى و يمكن مبتسم و بيقولك ما تقلقيش ..حصل خير ..هنلاقيلها حل ...انا ما بحسش بالاحساس دا كتير ..و للاسف ابويا مش من نوع الرجاله اللى يحسسك بدا ...بس فى ناس اعرفهم و بحب اعرفهم لانى بحس معاهم بدا احيانا ..و هو منهم ...مبتسم اغلب الوقت ...هادى ..احيانا تحسه مكبر كمان ...تقلق منه ...بيفكرنى بخالى كتير ..و خالى كتير بيكبر..و دايما متأخر ..بس انا بحب خالى قوى ...بحبه فى كل حاجه ..و بما انى بحبه ما بزعلش منه لما بيكبر و لا لما بيتاخر ..لانى كنت ببقى واثقه انه هيبقى فى ظهرى لما هحتاج له ..بس الايام اثبتت انه دا مش صح ..و انه كتير كان برضه بيكبر لما بحتاج له ..و انا لسه بحب خالى و لسه بحس بامان لما يكون موجود و بدور على راجل شبهه ..هو مش دا غباء؟؟

احيانا بيكون لازم نقف و نقرر ما نبصش ورانا ..و انا قررت احاول ما ابصش ورايا و امشى ..انسى زى كل الناس ما قدرت تنسى و ما افتكرش غير اللى بيفتكرنى و ما احبش غير اللى حبنى بجد و ما اديش ما دام اللى قدامى مش محتاج اللى هديهوله ..بحاول اتغير ..و حاسه بحاجات سوده قوى جوايا و حاجات كويسه احيانا ...بس النهارده ..رجعت تانى انام زى الفترة اللى كنت فاكراها عدت ..صحيت الساعه 7 ....و مش زعلانه قوى .زما هو كل حاجه و ليها اخر و اكيد مش هفضل طول عمرى كدا ..كل اللى طالباه دلوقتى و بدعى ربنا بيه ..انى مش عايزة اشوفه و لا اسمع صوته بجد ..عايزة ابتدى بقى ..الاقى نفسى من تانى ..ضيعت كتير قوى و كفايه ..كفايه قوى ..مش هعيض عمرى كله متعلقه على شماعه مستنيه ...غلط ..و مش ندامانه على اى لحظه او اى حاجه و ما بقتش مستنيه حاجه ..و مش حاسه انى قصرت بجد فى حاجه ..فى عندى حاله رضا عن اللى حصل و حاسه انى اتعلمت و ان اللى جاى اكيد هيكون احسن لانى اكيد فى حاجات اتعلمتها و اكيد مش هغلط فى اللى جاى نفس الغلطات ...كتير اتسالت عن هدفى و بتكسف اقوله ..بس بيتهيالى لازم ابتدى اقوله بصوت عالى و اعيده كتير ..عشان اقدر احققه ..لازم اصرخ بيه ..انا هدفى ..صورة ؟؟؟!! تخيلوا هدفى صورة محفورة فى دماغى ..واحد وواحده فوق الستين بيتعكزوا على بعض ...مش محتاجين لاى حد ..حتى اولادهم ...لسه بيمشوا مع بعض ماسكين ادين بعض و فى بسمه رضا على وشهم ...بجد ...هو دا حلمى و هدفى ..ما حلمتش بفلوس ..و لا عمرى حلمت بمنصب او شهرة ..او اى حاجه غير دا ..حتى الولاد ..مش فارقين معايا قوى ..المهم ..بجد ..الايد التانيه ..ايد حنينه ..بتخاف عليا و ..ممكن كتير تتخنق منى و اتخنق منها فى حاجات و يمكن نشد مع بعض ..بس فى الاخر كله بيروح فى لحظه و يفضل هو اقرب لى من امى و ابويا و افضل انا اقرب له من الدنيا كلها ...و لو دخلت اى علاقه و ما لاقتش فيها دا ..يبقى العلاقه دى زى قلتها ..يمكن اكون مجنونه ..و اللى بدور عليه صعب ..بس ما الواحد لو ما تعبش عشان يوصل للى هو عايزة مش هيحس بقيمته و انا كل ما بتعب و بقع ..بصمم انى هلاقيه ..و ببقى مستعده اتعب اكتر ..و اكتر ..و للاسف اتنازل اكتر ..بس مش مهم ..المهم انى احاول ..و لو وصلت ..يبقى الحمد لله و لو ما وصلتش ..على الاقل الصورة جوايا ..عارفه انى تعبت و حاولت انى احققها وانى ما رضيتش باقل منها ..رغم انى كان ممكن اقدم تنازلات..و اتجوز و اخلف ...بس ما كانتش هوصل للهدف فى الاخر ...بعلاقات اشبه ببيتنا ...الحمد لله على اللى فات و على اللى جاى و انا راضيه بيه ..و بحمده عليه و على النعم اللى ادهانى و الحب اللى خلقه جوايا ..و خلانى قويه بيه ..و لو فى نصيب ..هيحصل و قريب قوى ..بس ..لو فى نصيب!!;-)