الساعه تقريبا 2
المفروض انام ..ما ذاكرتش حاجه خالص ..بجد مش عارفه و مش عارفه اعمل ايه ؟؟
من الصبح متنحه و مبلمه و..ما اخدتش بالى انى حتى ما اكلتش غير لما امى قالت لى ..و بعدها برضه نسيت و افتكرت لما دخت ..هاا ..عندى حالة بيات شتوى و صيفى و خريفى و عينى مبحلقه و كلى تمام تمام ..مش حاسه باى تعب الحمد لله ...
بحاول ارفع فى 30 ميجا بقالى اكتر من 6 ساعات ..لما اتخنقت بجد ..دا غير انهم عشان يتعملوا اخدوا لهم برضه بتاع ساعتين او 2 ..و ساعتين او 3 كتابه ..و و ساعه سرحان ..و ساعه عياط ..و بعدين ..هو اليوم فيه كام ساعه يعنى ؟؟
لازم انزل بكرة ان شاء الله
يا رب الفايل يتحمل ..لسه فى اوله اصلا ..عمل خمسه فى الميه بس...بفكر اقوم انام ..بس صعبان عليا
هاها..كأنى قريت فيها ..اهو ابتدى من الاول تانى ..يا رب ..ارحمنى من النت اللى بيموت دا
طيب و بعدين ..بقوا 5 ايام و انا لسه ولا ذاكرت و لا جبنا حاجات كتير ..هو انا دايما كدا على اخر لحظه؟؟ لازم بكرة اعصر على نفسى ليمونه و انزل اشتى الحاجات و لو انى بجد بقيت بكرة اللف ..بالذات لما تبقى بتدور على ابرة فى كوم قش ..قصدى بتدور على طرحه ..بجد صعب ..ربنا يكرم بقى ..و بعدين الكرافته دى كمان ..مشكله ..بتحصل ..ربنا يكرم
فى حاجات مش فاهماها ..و علاقتى بالناس مش فاهماها ..و اللى حصل امبارح مش فاهماه ..و ايه كان قبل ايه مش فاهمه ..الاطراف كلها كانت بتقول كلام قبل كلام و كلام بعد كلام و ساعات كتر ما كنتش ببقى مستوعبه و بصراحه ..لحد دلوقتى لسه طور الله فى برسيمه ..يالله ..ربنا يكترلنا من البرسيم كدا ..بس اهم حاجه يبقى دايت ..عشان الرجيم
الفضول بيقتلنى عايزة اعرف خسيت قد ايه؟؟ بس نسيبها بظروفها بقى ...ما انا اللى مكسله اروح للدكتورة
هى ليه الناس بتقفش بسرعه على بعض و مش بتطيق كلام بعض..و كل ما يقربوا من بعض اكتر ..يتعصبوا على بعض اكتر ..و يزعلوا من بعض اسرع ..ليه هه..رغم ان المنطقى العكس ..و لا انا برضه مش فاهمه؟؟ يعنى ايه الصحاب تكسب البيت ؟؟و لا ايه بقى؟؟
لو البتاع دا فصل تانى مش هرفع الفايل اصلا ..هه.. و عليه العوض و منه العوض بقى ..اهى دى اخرة التكنولوجيا ..تضييع وقت عالفاضى ..
على فكرة ..دماغى بدات تتقل ..هو انا بكتب ليه ..تصدقى اكتشفت اكتشاف ..انا بكتب و انا مش عامله حسابى ان فى ناس بتشوف اللى بكتبه ..و بصراحه ساعات كتير بكتب ..كانى ببعت ميل للافندم اصلا..طيب ..هو دا فيه مشكله؟؟؟ انا معنديش مشكله ..لان معنديش اسرار كتير ..بس كل ما بتخيل ان حد ممكن يدخل و يشوف الهرجله اللى هنا دى ..بيصعب عليا و بتوقع رد الفعل المنطقى طبعا ..اقلب الصفحه يا بنى ..المهم بس ما حدش يزعل منى ..دى اهم حاجه
حاجه لطيفه جدا بقى ..بقالى فترة كبيرة ..مش لطيفه خالص ..او بمعنى اصح لطيفه ..بجد ..ربنا يجعل كلامنا خفيف عليها ..مش بعبر حد حتى برنه ..رغم انى ممكن افتكر ناس كتير بس بكسل و بالتالى و المنطقى ان ما حدش بيعبرنى ولا حتى برنه ..و طبعا دا منطقى و بالتالى النهارده تليفونى ..حتى ما رنش .. كان احساس ..هايل ..بصراحه ..ربنا ما يحط حد فى الموقف دا ..هو بصراحه رن يعنى ..بس بعد ما انا رنيت ..هااا
انا رغايه قوى ..مش عارفه بجيب كل الكلام دا منين و بعدين انا بكتب هنا للزمن ..بس بجد بقى ..مش عارفه هبقى اجيب وقت منين عشان اقرا كل دا ...و لا ايه ؟؟
"ساعات بحس اني بتكلم كتيـــــر و ساعات بحس اني باتكلم بالعافية "
