طول عمرى مرتبطه بالكاميرا قوى رغم انى مش شاطره فى التصوير بس دى اكتر حاجه بتبسطنى من صغرى و انا فى اولى اعدادى بدا اول هواجس انى نفسى فى كاميرا من الكبار دول او حتى كاميرا فيديو من اللى بتصور صور عاديه .... و فضل الهاجس يكبر معايا ... افتكر انى و انا فى تالته اعدادى بابا قالى لو جبتى فوق ال 85 فى الميه هجيب لك كاميرا و طبعا انا ما صدقتش لانى كنت مقتنعه انها غاليه قوى و قعدت اسال و ساعتها توصلت ان الكاميرا الفيديو اللى بتصور ب 3 تلاف و نص و طبعا بابا لما عرف السعر ما جبش سيره الهديه دى تانى :-D و فضل الهاجس يكبر و ما كانش عندى اى حد افهم منه هى الكاميرا الكبيره دى ايه و لا بكام ... و دخلت الجامعه و خلصتها و انا بصور بكاميرة الطفوله الياشكا و اما اخواتى زنوا على بابا و خلوه يجيب السايبر شوت كنت ببقى مبسوطه اوى لما بعرف اخدها احيانا ( دا كان بعد الكليه ما خلصت ) و باظت الكاميرا السونى و انا كنت اشتغلت و باول مرتب جرى جبت موبايل بكاميرا 3 ميجا بيسكل و دا كان موبايل جامد فى الوقت دا و كنت هطير من الفرحه لان اخيرا بقى عندى كاميرا بتاعتى ! بس ما كنتش راضيه عن الصور اللى بتطلع و رجعت ابص للكاميرا الكبيره بحسره و سمعت عن كورس تصوير فقدمت عشان اعرف اسمها ايه البتاعه دى و بكام و بصراحه الكورس احبطنى اكتر لانى حسيت انى محتاجه معجزه عشان اقدر اشترى البتاعه دى و اجيب لها عدسات .... و فى الوقت دا انتشرت الدى اس ال ار ... و اتسرق الموبايل ابو كاميرا و قعدت يجى سنه احوش فى تمن موبايل جديد ب 5 ميجابيكسل المره دى .... لو كنت فاكره صح ....و فى نفس الوقت اختى اشترت الكاميرا الكبيره و بقيت بصور لى بيها صورتين كل ما نخرج مع بعض ... و اكما عك بموبايلى التاتش ابو 5 ميجا اللى مكملش سنه و اتكسر هو كمان و بالصدفه ساعتها كنت فى كندا ... فقررت اجيب كاميرا على قد فلوسى و دفعت وقتها ما يقرب من 3 الاف جنيه فى كاميرا ديجيتال و انا ببص بحسره على الحلم و اقول معلش بكره هجيبها ... كل حاجه بوقتها .... و كنت مبسوطه بكامرتى و احيانا استلف كاميرة اسماء لما تبقى راضيه عنى و كانت ماشيه بس برضه ما كملتش سنه و الكاميرا الجديده باظت و اسودت الدنيا فى وشى و كنت ساعتها فى المانيا ... قعدت يومين الف على محلات الكاميرات و فى الاخر كنت هشترى واحده بكل الفلوس اللى فى الفيزا و مستعمله ... و كلمت اختى قالت لى بلاش ... ماهى موجوده فى مصر ... و بلاش مستعمل ... رجعت للراجل و اتاسفت له و فضلت طول الرحله متدايقه و بقضيها بالديجيتال البايظه .... و اما رجعت اكتشفت انى مش هقدر اشترى اى حاجه لانى مديونه لسنه قدام و فضلت اعك باللى معايا و استلف من اسماء لحد ما اتجوزت و من اجمل لحظات حياتى لما اكتشفت ان زياد عنده كاميرا سيمى بروفيشنال بس كان ما بيستعملهاش و بالتالى انا اتكسفت اجى جنبها ...بس لاول مره احس انى بقى عندنا كاميرا ... حتى لو مش بستعملها ...بس كنت حاسه بفرحه فظيعه و سافرت تانى ... المره دى قعدت التلات شهور يوميا اتابع اسعار الكاميرات على امل انى الاقى واحده لقطه اجيبها بتمن الموبايل و مالوش لازمه الموبايل ابو كاميرا خالص.... و لما لقيت انه مفيش فايده جبت موبايل تفتكره كاميرا و اول ما رجعنا مصر مسكت كاميرة زياد و انيسطت قوى لما اكتشفت انها سليمه و بدات اصور سلام بيها بعد ما غلبت فى انى اقنع اسماء انها تصورة و فشلت فى انى استلف كاميرا و كنت مبسوطه قوى انى قدرت اصور سلام رغم انى ما كنتش مبسوطه من الصور ... و لا مقتنعه انى بفهم فى التصوير ... بس انا بحبه و بحب ابنى و بالتالى انا اكتر واحده هصبر عشان اصوره! و مع الوقت و كل ما كان سلام بيكبر كان الموضوع بيحتاج لكاميرا احسن و من شهرين تقريبا استلفت كاميرة اسماء و صورته بيها و انبهرت من الفرق ... ورجع تانى الهاجس يجى لى و اقول مسيرى يوم هجيب واحده ...بس هيكون سلام كبر ... و بما انى مش بعرف استلفها كتير فكاميرة زياد كانت دايما المنقذ و امبارح قعدت اعيط اكتر من ساعتين بالليل عشان بقالى فتره عايزه اصور سلام و مش عارفه استلف كاميرا ...و حاسه انى مش هعرف اصوره تانى بكاميرة زياد صور ثابته ...و فى الاخر نمت و انا بقول الحمد لله ان عندنا واحده واصلا صورها حلوة ... امال لو ما كانتش موجوده كنتى عملتى ايه .... المهم كانيرة زياد اتكسرت النهارده ... و بس !
Thursday, September 25, 2014
حكايتى مع الزمان
Wednesday, July 23, 2014
انا بحب ابنى
على طريقة اعلان رامز السنه دى ....الجمله بتردد فى ودنى ...انا بحب ابنى ...انا فعلا بحب ابنى لدرجه الجنون ...ربنا يخليه ..و بخاف عليه لدرجة الوسواس ساعات ...انا بخاف عليه من هوا المحروسه ومية المحروسه و اكل المحروسه و لبن المحروسه و بامبرز المحروسه و شوارع المحروسه و ناس المحروسه اصلا! و على قد ما بحب ابنى ...على قد ما طول عمرى بحب التصوير ...و صور الاطفال ..بس الفلس وحش و انا محلتيش 1000 جنيه كل اسبوع اعمل له بيها سيشن و لا فى مصور بيعمل ابونيه للامهات المجانين امثالى ...و قال على راى مثل المحروسه ...الشاطر تغزل برجل حمار :-) و انا قررت انى احاول اقفش لحظات كتير من عمر حبيبى بنفسى و ما استناش المنقذ:-) بس لسه عايزه اصوره كل يوم و بتبسط قوى لما الناس تحبه و تحب صورة هى كمان و بتخنق لما اكتشف ان حد بيقلدنا و هو لا بيحب التصوير و لا مجنون بابنه ...انا هتجنن و الله ...نفسى اهرب بيه من البلد دى ...هى الاعمار بيد الله ...بس ربنا قال ما ترموش بنفسكم فى التهلكه و انا حاسه انى برمى ابنى بيدى !
Monday, May 19, 2014
تحيا مصر
تحيا مصر انتخبتك انت او غيرك هتحيا
تحيا مصر بيك او مع غيرك هتحيا
تحيا مصر ....ما هى رغم الزمن لسه عايشه ...بتنازع و تحارب الوهن و عايشه
لسه الناس بتضحك و الشوارع فى الفرح هايصه
بورصه وقعت ...اقتصاد انهار ...شغل طار ...شعب ظايط ليل نهار!
تحيا مصر؟ و لا قصدك ...تحيا انت ... باسم مصر ...!
يا دى الحوسه!
كتوبر 2011 و بالتحديد وقت زيارتى لكندا كنت مخنوقه من كل ما هو مصرى و عايزة اطفش ...السنه دى كانت سنه عجيبه ...بكل ما تحمله كلمه عجيبه من معانى ...خسرت حاجات كتير و عييت لفترة طويله و كانت حوسه فى اللف على الدكاترة ...و طبعا كله كوم و الثورة كوم تانى و علاقتى بناس كتير بعدها كوم عاشر ...المهم انى فى الزياره دى قررت اهاجر وانا بعنى كلمه قررت.....انا كان نفسى قوى ادرس فى كندا من ايام المدرسه ...بس الزيارة دى خليتنى اقول انا هطفش خالص ... الغريبه انه فات من وقتها اهه كام سنه و انا لسه متبته في مصر و لا حتى عملت ورقه فى ورق الهجرة لاى دوله ...و بجد من جوايا مش عايزة اسيبها و بقالى كام سنه مرعوبه لاعمل ورق الهجرة و اتقبل فعلا عشان ساعتها هتبقى حوسه ...كتير بيبقى نفسى امشى ... و اقعد اخرف و اقول امتى نمشى و بعد ما سلام شرف بقيت بقول لنفسى مش حرام علينا نربيه فى المولد دا ...مش حرام يعيش يشم تراب و حتى ما يكونش عنده مساحه ينطلق فيها ....مش حرام اقتله و اقتل طموحه و احلامه فى بلد الناس عايشه فيها بالدراع و المظاهر ...فشخرة كدابه عالفاضى و مدارس مصاريفها قربت على الميت الف و يا ريتها تطلع علماء و لا ناس بتنفع المجتمع ..لا دى بتطلع اطفال من كوكب تانى منفصلين تماما عن المجتمع اصلا! مش حرام اعمل فى ابنى كدا و اطلعه معقد فى بلد كلها كلاكيع ....و الصراحه نفس الحوسه بحسها فى عيون جوزى ...و بنتحجج بالفلوس احيانا عشان نبرر سبب عدم تقديمنا لاى ورق فى اى حته ...و بانب نفسى كل ما اعرف ان حد من صحابنا ماشى و اقولها يا خوفى لبكرة تندمى على كسلك فى عمل الورق دا ...و السنين بتعدى و انتى قاعده مكانك ... رغم ان ناس كتير فكروا فى الفكرة دى بعدى بكتييير و مشيوا او هيمشوا قريب ... و اغلب اللى قاعدين نفسهم يحصلوهم ... احنا لسه بنتحجج بالفلوس! بس الحقيقه ... كل اللى يعرفنى كويس يعرف ان الفلوس دى مش سبب حقيقى...لانى لو حطيت حاجه فى دماغى و لا الجن الازرق هيمنعنى ...مش الفلوس! ...الحقيق انا كل يوم بحس ان جدورى ضاربه فى ارض البلد دى و الحرام الفعلى انى اسيب اهلى و بيتى و ارضى عشان اكون مواطن مطحون فى بلد تانيه ...بس لمجرد انى هعيش عيشه ظاهريا احسن ...لان فى الاخر كل مجتمع و ليه مشاكله و لان الناس اللى دماغها شغاله زيى طول الوقت ...عمرها ما هترتاح و لو عاشت فى الجنه ...اه بيصعب عليا مستقبل الولد او الولاد اللى بضيعه باديا ...بس بصراحه ...الحمد لله ...حتى و احنا فى اسواء احوالنا و البلد فى اصعب احوالها وجودنا وسط اصحابنا و اهلنا و فى ارضنا اكيد يفرق ...و اكيد ليه تمن...طيب هنسيبها؟مش عارفه ...و لحد دلوقتى مش قادرة افكر فى دا بجد ...انا اخرى اسافر كل سنه اسبوع او حتى شهر اشم هوا نضيف و اشحن و اجى اكمل بالشحنه السنه وسط الناس اللى بحبهم ... يمكن الحل دا غير متاح حاليا ...و يمكن الايام تجبرنا على حلول تانيه ...بس لحد دلوقتى ...ادينا قاعدين على قلبها ...عشان لسه عندنا امل فيها و عشان هى حلوة قوى و اوحش حاجه فيها احنا!