بقالى 3 ساعات بظبط البروفايل و فى الاخر ما عرفتش ..كل دا عشان ارفع صورة من صورى احطها خلفيه و ماعرفتش فاخترت واحده مناسبه لحالتى اليومين دول و شبه مكتبى بجد!!و بصراحه بتفكرنى بكندا ..وحشتنى جدا!!بكرة تعرف يا حبيبى ...تعرف ما تعرف ..بس يهمنى ..لمصلحتى ..مش لمصلحتك ..عشان انت ما دورتش غير على مصلحتك ..انك ما تعرفش ..تعرف ليه؟ ..لانك لو عرفت يمكن تستخسر و تفكر ..بس انا ساعتها مش هفكر و اكيد ..هكون انا الخسرانه ..طول ما فى طرف اقوى و طرف ضعيف و الطرف الاقوى بيتظاهر بالضعف و قله الحيله ..دايما هتبقى الكفه ماليه و خسرانه خسرانه

حسين فى مصر!!

السعوديه..امبارح لاقيتنى بعيط لما سمعت اعلان مصر للطيران ..نفسى اطلع حج..يا رب اكتبها لى قبل ما اموت يا رب..يسرها ..

حلمت ان شعرى كله وقع و دا من اثار تساقط الشعر الازلى اللى عايشه فيه ..انى اغرف وسط شعرى المتساقط ..هيه دنيا ..كبرت ..لا ..بس اتجننت و قررت اطوله لاول مرة من 13 سنه !! اه و الله ..اخر مرة عملتها كنت فى ثانويه عامه!مع كل علاقه كانت بتنتهى كنت بحلق شعرى زى الرجاله و كانى بخلص من مشاعرى مع شعرى المحلوق ..كنت بعذب نفسى بانى بقصه بايدى ..عشان اكون اقوى من نفسى و اجبرها على انها تكون قويه!زياد اول واحد معملتش معاه دا ..بالعكس صممت اطوله و ما قربتلوش من يوم كتب كتابنا ..يعنى من 2007 مفيش مقص لمس شعرى غير وقت العمرتين و من شهر بالظبط!انا كنت بعتبر دا تحدى ..و نفدر نفول فى الاشعور كنت بتمسك بزياد قد تمسكى بشعرى!!رغم انى عارفه ان الاتنين اضعف من بعض و ان هيجى يوم و هقصه !عموما راح زياد و فضل شعرى الحمد لله بيتساقط..و شكله هيروح قريب هو كمان :)

صورى ..قررت احط حبه من صورى ..فراغ الورد ..انا بحب حاجتين دلوقتى الورد و النجف !!بعشق الضوء و الطيور..و قبلهم الورود و الزرع..و الزرع اللى على مكتبى هيجننى ..انا بدات احس اننا فى الربيع ..رغم اننا فى عز الخريف :)! بخرف؟

كان نفسى اشترى خروف السنه دى ..بس ديونى قد تمن يجى 15 خاروف ..اه و الله بجد ..كتييير فعلا كدا!!ان شاء الله ربنا يدينى العمر و يكتبها لى السنه الجايه

و بكرة تعرف ..تعرف ..يا حبيبى!!بس يا خسارة عالحب اللى كان ..لما تعرف!

الحياة بجد صاعبه و الانسان طول الوقت بيجاهد عشان يعيش :)
سفر ..السفر احلى حاجه فى الدنيا ..لو ما فيش حاجه تربطلك بالارض ..سافر ..
بحاول اتغير ..بعمل مجهود صعب بجد ..و الاصعب ان دا لوحدى ..لانى ببساطه كنت مفلسه بسبب السفر و مارحتش للدكتورة من اكتر من شهرين و بطلت الدوا من اول يوم ليا فى كندا :)
لحظات كانت لحظات و هو ..كان ..كل كان ..قطعت مع كل الناس و مش عايزة اعرف حد فيهم تانى و لو حسيت ان حد انا عنده مش قد ما هو عنده ..هيكون مصيرة زيهم ..خلاص ..انا فى مرحله تصحيص:) و برضه مافيش حاجه بتتصلح :)