عم نيبل ..ابو احمد ..او محمود ..راجل كبير كباره كدا ..اكيد اكبر من ابى و بعدين شعرة كله ابيض ووشه باين عليه علامات السن و الحق يقال شكله راجل محترم ..بالقميص الازرق المايل على رمادى و الوش الابيض قوى اللى رغم علامات الزمن اللى فيه ..بيقول انه كان مدوخ البنات فى شبابه و لا رشدى اباظه..و البلوفر ..او الجيليه الكحلى ..و البنطلون المقارب لنفس اللون ..اللى بيقولوا ان عم نبيل راجل انيق ..و طبعا ما ننساش الجرنال ..لان دا حاجه مهمه جدا ..بتدل على ان عم نبيل راجل مثقف و فى نفس الوقت ..بيعانى من فراغ طويل بيملاه بالجرنال اللى دايما ماسكه فى ايده و اللى فى الحقيقه اكتر من جورنال ملفوفين فى بعض

ماشى ..جميل جدا ..ايه بقى حكايه عم نبيل ؟؟

مم ..الحكايه يا ساده ..تتلخص ..فى ان امبارح كان يوم طوييييييل و ممل و خلصنا الكورس متاخر جدا و بالتالى كان اليوم اتضرب ..و لاقيتنى تايهه فى مصر الجديده مش عارفه اعمل ايه و فى نفس الوقت ما كنتش عايزة اروح و عايزة افضل فى الهواء الطلق ..او اخش :--:-D سينما ..و لكن و بعد طول مشاورات و مداولات و لف و صعلكه - رغم انى بنطقها صعلقه

قررت انى اروح بيتنا و اخد اول اى حاجه تودى بيتنا عدل ..مش مهم بقى ايه الحاجه دى ..مينى باص ..ميكروباص ..مكيف ..ان شاء الله حتى اتوبيس نقل عامل ..لان بصراحه رجليا كانت بتوجعنى جدا و كنت اتخنقت ..فاى حاجه تودينى بيتنا ..الا التاكسى ..لانها ما كانتش ناقصه خراب بيوت ..المهم فكرت انى اخد 3 ..هو مينى باص اخضر ..يجوب الكرة الارضيه ..من شرقها لغربها ..يعنى فسحه ظريفه ..بما انى ما ليش مزاج اروح ..انا طولت عليكم ..مش كدا ..بس اصل الحكايه ..انى لما رحت المحطه ما لقيتش 3 و لا حتى 4 - و هو مينى باص برضه اخضر ..بس بياخد السكه فى وقت اقل شويه ..حيث انه بيلف الدنيا من شرقها بس .._ولاقيت 124 و هو مينى باص برضة اخصر ..لكن للاسف ما بيلفش الدنيا خالص و يا ما كنت بحلم انى اشوفه ايام ما ببقى مستعجله ..لانه اكتر واحد بيختصر المسافه ..قوم القدر يخلينى الاقى فى وشى 2 بدل واحد و الاقى المحطه فاضيه ..يعنى هتركبيه ..يعنى هتركبيه ..قلت و ماله ..ياله بقى ..اروح على طول و خلاص ..و ادينى هروح اكتيب عن قوضه النوم اللى شفتها النهاردة (هحكى حكايتها دى كمان شويه )و الكورس و الامتحان و اقعد اتفرج على فيلم ناجى العلى ..للاسف 124 واضح انه مش زى 3 و لا 4 ..ما فيهوش الكرسى الفرضانى اللى بيبقى ورا السواق ..و انا بصراحه ما بحبش اركب جنب حد ..بس قلت امرى لله بقى .اركبه و احنا بالليل و مش هيزحم ..ركبت و طلعت ال ام بى فور اللى كان بيخرف و راسه و الف سيف ما اسمع غير على قد الشوق ..يا سيدى يهديك ..يرضيك ..بعد طول مناهدة ..رضى يسمعنى نجاه..انا بستناك ..تمام يا معلم ؟..تمام يا ريس

الراجل قطع التذاكر و انا مركز مع نجاة و الشباك ..حسيت ان حد قعد جنبى ..طبعا اتخنقت ..من اول الخط كدا؟؟بس واضح انه كان راجل طيب ..لانه ما دايقنيش و بصيت بطرف عينى لاقيته راجل عجوز وواضح ان صحته على قده ..فقلت اكيد هو قعد هنا عشان مش قادر يرجع ورا ..يا عينى غلبان ..حبه و الاتوبيس اتحرك و حسيت بحركه جنبى ..اكتشفت بعد فتره ان الراجل دا كان بيكلمنى و طبعا انا مش سامعه من ال ام بى فور ..كان بيسالنى عن رقم الاتوبيس و هو مستغرب انه غير مسارة ..سكت نجاه مؤقتا لحد ما ارد عليه ..فاخد باله انى كنت بسمع حاجه ..اعتذر ..و سالنى بصوت ابوى جدا ..كانه بيكلم طفله ..بتسمعى ايه بقى ..ابتسمت و قلت له نجاه ..قالى ياااه برافو عليكى ..و بتسمعى ايه بقى لنجاه ..ما اعرفش ايه اللى خلانى ارد عليه بسرعه و اقوله لا تكذبى ..رغم انى كنت بسمع انا بستناك ..بس بصراحه اتكسفت اقوله ..فقالى جميل جدا و عندك ليها ايه تانى ..فقلت له عندى ...و قلت له اسامى كام اغنيه من اللى عندى و انا بفكر فى انى عايزة اكمل الاغنيه ..قعد يسالى طب عندك عبد الحليم ؟؟ ام كلثوم ؟؟اغانى ايه ؟؟ و الله انت انسانه جميله ..مش زى شباب اليومين دول بتوع نانسى و هيفاء ..و انا رضيت بان دا موجود و دا موجود ..و رجعت اسمع تانى ..قام الله يكرمه سالنى انت خلصتى كليه ..قلت ايوة ..فقعد يسالنى عن كليتى و الشغل و الدراسه و يتكلم عن محمود ابنه خريج هندسه المنيا و احمد المحاسب و انا بسمع و برض و انا مبستسمه و مقلقه و بقول ..اهو راجل قد ابويا ..معلش ..سالنى عن اسمى ..رضيت ..الله ..حتى اسمك جميل على اسم الشيماء اخت الرسول ..الله يكرمك يا سيدى ..سيبنى بقى اسمع الست ..طبعا كنت بقول كدا فى سرى و قررت انى ابص الناحيه التانيه و اطنش ابو محمود ..او ابو احمد زى ما بيحب الناس تقوله ..بالذات بقى لما قالى انه بيشتغل فى سينما هيليوبليس و انى لازم اجى ازورهم فى يوم ..و هو هيداخلى انا و اصحابى كمان ..قلقت اكتر رغم انى فضلت اتكلم بنفس الابتسامه

المهم ..قعدت اسمع ..و بدات افقر ..بس فضلت طول الوقت ..مقلقه من عم محمود ..رغم انه و الله كان راجل محترم ..بس ..فضلت طول السكه ..كل ما عينى تغفل ..افوق مخضوضه ..لدرجه انى فكرت انزل ..لحد ما وصلنا لميدان التحرير ..لاقيت عم محمود بيقولى ..شيماء ..انت هتنزلى فين ..انا شايفك بتنامى ..قولى لى انت هتنزلى فين ..عشان اصحيكى ..اتكسفت جدا و ابتسمت و عملت انى فوقت و قلت له انا نازله اول القصر العينى و رجع يتكلم تانى و يسالنى عن اخواتى و انى ساكنه فين و باخد الكورس فين و بركب ايه الصبح و ايه بعد الضهر و ان كنت ساكنه فى الناحيه اليمين و لا الشمال فى شارعنا و قالى انه معاه موبايل و ممكن ياخد نمرة تليفونى عشان يكلمنى ..و هنا ..نط الهاجس اللى جوايا من الاول و قلت له ..انا اسفه ..بس انا ما بديش نمرة تليفونى لحد ..معلش سامحنى و ما صدقت ان بيتنا قرب و جرى على الباب ..و نزلت و انا مش فاهمه ..هل عم نبيل راجل طيب فعلا زى ابويا ..و لا عم نبيل كان بيروش