بتحصل ..و الله بتحصل .. و لما تبقى عايش فى بيتنا ..يبقى غريبه لو ما حصلتش .. الطبيعى انها تحصل ..

امبارح مروحه تعبانه ..عامله زى الفرخه الدايخه..وواخدة تاكسى الصبح و تاكسى بعد الظهر ..يعنى خراب بيوت ..و اول ما دخلت ..من غير لا سلام و لا كلام ..على قوضتنا عدل ..لاقيت خير الله اما اجعله خير ..(ساموكا) ..اختى الصغيرة ...اللى بيقولوا عليها انها الصغيرة ..قافله الباب و مولعه التكييف ..طب انا كنت دافيه و عندى برد و هموت و انام و اشرب حاجه دافيه ..قلت لها بمنتهى الهدوء و الاعياء ..اسماء انا تعباهة وواخده اذن وراجعه بدرى عشان انام ..ممكن تطفى التكييف ؟؟ بصت لى بقرف من تحت النضارة وقالت لى اخرجى نامى برة(برا دا اللى هو فى الصاله ..على الكنبه يعنى ) ابتسمت و قلت لها اسماء انا تعبانه ..هنام برة فين ..قالت لى مش ذنبى ..الدنيا حر ..و انا مش هطفى التكييف ..كتمت غيظى فى سرى ..و غيرت هدومى و لبست ايشارب و عقدته عقده محترمه عشان ابقى كلى مستخبيه تحت الغطا و نمت ..حسيت بعد فترة ببابا ..بيقولى انزل معاهم عشان نجيب الانتريه ..بصيت له و قلت له انا تعبانه ..فجات ساموكا حبيبتى تقولى الحقى بابا و ماما هينزلوا يجيبوا الانتريه ( دا فى نظر ساموكا مصيبه ..لانها لا تثق فى ذوق امى و ابى ) قومى البسى و انزلى معاهم ..عشان انا تعبانه و مش هقدر انزل ..(هو دا اللى ربنا قدرها عليه ..تقولى انى انا اقوم البس) ..بصيت لها و ما رضيتش ..و بعد حبه كدا ..ماما جات سالتنى ..انتى تعبانه؟؟ (طب ما انا متكلفته و نايمه فى السرير ..عياقه؟؟) ..شاورت بدماغى ..ااه ..تعبانه ..قالت لى معلش ..اتحسدتى ..(نفسى اعرف مين حسدنى و اتحدست على ايه اصلا ؟؟) ..سكت و ابتسمت و كملت نوم ..صحيت ..مرة فى النص ..و بعد كدا صحيت قبل الفجر ..كنت هموت من الجوع و اكتشفت ان ما حدش حتى جابلى كوبايه مايه و انا اللى بحلم بحاجه دافيه ..بصراحه حتى ما قدرتش اروح المطبخ اشرب و يادوب رحت الحمام ..اللى حنفيته قامت بالواجب ..نمت و صحيت الصبح على صوت ماما و هى بتقولى انتى كدا هتتاخرى و بتسالنى هو انت ما كالتيش حاجه من امبارح ..هى دعاء ما عملتلكيش شربه ..اخص عليها ..دا انا موصياها قبل ما انزل ..يعنى انتى ما اكلتيش ..طب هعمل لك ليمون ..ابتسمت و هى بتدينى كوبايه ليمون و ساندوتش ..جبنه ..شربت الليمون و اكتشفت ان الجبنه من النوع اللى بكرهه ..بس عيب اكسفها ..الست تعبت برضه ..شربت الليمون و اكلت ساندوتش الجبنه و انا بحاول اقنعنى انه عيش حاف طعمه حلو ...كنت مبسوطه جدا ..ان امى افتكرت تعمل لى ليمون قبل ما انزل و نزلت معايا و جابت لى عصير و كيك و قعدت تقولى لازم تاكليهم قبل ما تروحى ..ربنا يخليها و يخلى لى بابا ..اللى كان عايز ياكلنى فطير مشلتت ..و يخلى اسماء بتاعته التكييف و يكرمهم كلهم يا رب ..شفتوا بقى انها بتحصل